Abdullah Kavukcu “Qalatasaray”dakı vəzifəsindən istefa verdi

“Qalatasaray”ın İdarə Heyətinin sədr müavini Abdullah Kavukcu klubdakı vəzifəsindən ayrıldığını açıqlayıb. Lent.az-ın Apasport.az-a istinadən yaydığı məlumata görə, klub rəsmisi qərarını ictimaiyyətə bəyan edib və bundan sonra da “Qalatasaray”ı dəstəkləyəcəyini bildirib. Kavukcunun sözlərinə görə, oktyabrın 27-də keçirilən İdarə Heyətinin iclasından sonra klubun vitse-prezidenti Metin Öztürklə aralarında mübahisə yaşanıb. O, həmin hadisənin sosial şəbəkələrdə şişirdildiyini və reallığı əks etdirməyən şəkildə təqdim olunduğunu söyləyərək bundan təəssüfləndiyini vurğulayıb. Klub daxilində baş verən sözlü qarşıdurmanın ictimai müzakirəyə çevrilməsindən sonra Kavukcu istefa qərarını “Qalatasaray”ın nüfuzuna və birliyinə zərər dəyməməsi ilə əsaslandırıb. O, klubla əlaqəsinin kəsilmədiyini, bundan sonra da komandaya dəstək vermək niyyətində olduğunu qeyd edib. Məlumatda bildirilir ki, həmin gün keçirilən iclasda Kavukcu ilə Öztürk arasında qarşılıqlı sözlü mübahisə baş verib. Hadisədən sonra Metin Öztürk də klubdakı vəzifələrindən istefa verdiyini açıqlayıb. Beləliklə, eyni mübahisənin ardınca “Qalatasaray” rəhbərliyində iki klub rəsmisi istefa qərarı verib.