Arakwiye Bernadette yatorewe kuyobora inama mpuzamahanga ya MOP 38

Minisitiri w’Ibidukikije w’u Rwanda, Arakwiye Bernadette, yatorewe kuyobora inama ya 38 ihuza ibihugu byashyize umukono ku Masezerano ya Montréal. Amakuru yatangajwe na Minisiteri y’Ibidukikije agaragaza ko iri torwa rizamushyira imbere mu biganiro mpuzamahanga byo gusuzuma uko ibihugu birimo gushyira mu bikorwa inshingano zabyo zo kurengera akayunguruzo k’izuba. Inama ya MOP 38 iri kubera i Kigali kuva ku wa 2 kugeza ku wa 6 Ugushyingo 2026. Ihuje ibihugu byemeje amasezerano yashyizweho mu 1987 agamije kugabanya no gukuraho ikoreshwa ry’imyuka n’ibinyabutabire byangiza akayunguruzo k’izuba, karinda ibinyabuzima imirasire ishobora kubangiza. Mu nshingano ze, Arakwiye azayobora ibiganiro byibanda ku kureba intambwe ibihugu bimaze gutera, ibyagezweho n’ibikwiye kongerwamo imbaraga. Ibindi biganiro bizibanda ku bufatanye mpuzamahanga no ku ngamba zihuriweho zo kurengera akayunguruzo k’izuba, mu gihe ibihugu bikomeje gushaka ibisubizo ku bibazo by’imihindagurikire y’ibihe. Aya masezerano yavuguruwe i Kigali mu 2016, aho ibihugu byemeje kugabanya ikoreshwa rya Hydrofluorocarbons (HFCs). Iyo myuka ikoreshwa cyane mu bikoresho bikonjesha, ariko ikagira uruhare mu kongera ubushyuhe ku Isi. Inama iri kubera mu Rwanda ibaye nyuma y’imyaka igera ku icumi u Rwanda rwakiriye ibiganiro byagejeje ku kwemezwa kw’iryo vugururwa. Minisiteri ivuga ko gutorerwa kuyobora iyi nama ari intambwe igaragaza uruhare rw’u Rwanda mu biganiro byo kubungabunga ibidukikije. Arakwiye afite ubunararibonye mu byerekeye ibidukikije n’ubumenyi bw’Isi. Yize ibinyabuzima muri Kaminuza Nkuru y’u Rwanda, akomereza amasomo mu bidukikije muri Antioch University, nyuma abona impamyabumenyi y’ikirenga mu bumenyi bw’Isi muri Clark University muri Leta Zunze Ubumwe za Amerika. Mbere yo kuba minisitiri, yayoboye gahunda yo gusana ubutaka muri Afurika mu kigo World Resources Institute, anagira uruhare mu bikorwa by’ubushakashatsi n’inzego zishinzwe kubungabunga ubutaka. Ibyo byamuhaye ubunararibonye mu bikorwa byo guteza imbere ibidukikije ku rwego rw’umugabane.