Avdullah Hoti kërkon riorganizim të LDK-së pas tri humbjeve zgjedhore

Avdullah Hoti ka kërkuar ndryshime të thella brenda Lidhjes Demokratike të Kosovës, duke thënë se partia nuk ka arsye të kënaqet me rezultatet e fundit. Sipas tij, LDK-ja ka humbur tri palë zgjedhje radhazi dhe nuk ka pasur një përgjegjësi të qartë politike për këto humbje. Në një prononcim për T7, Hoti tha se partia duhet të riorganizojë veten dhe mënyrën se si vepron në opozitë. Ai këmbënguli se procesi i zgjedhjes së një lidershipi të ri duhet të jetë gjithëpërfshirës, transparent dhe konkurrues. Sipas tij, anëtarët nuk duhet të ndihen të qetë derisa partia të rikthehet te fitorja në zgjedhje. Hoti iu referua edhe reflektimit të vitit 2021, pas humbjes së zgjedhjeve dhe kalimit të kandidates së LDK-së për kryeministre në kampin tjetër politik. Ai e dalloi atë periudhë nga situata e tanishme, për të cilën tha se nuk ka sjellë një marrje të qartë të përgjegjësisë pas tri humbjeve. I pyetur nëse do të kandidojë për kryetar të LDK-së, ish-kryeministri tha se për momentin nuk mund të japë një përgjigje. Megjithatë, ai kishte shprehur më herët interes për të hyrë në garë, por procesi ishte ndikuar nga ndryshimet në rregullat statutare për thirrjen e Kuvendit të partisë. Hoti nuk e konfirmoi nëse do ta paraqesë kandidaturën në procesin e ardhshëm.