Baby Giant, nakabili ng sariling bahay matapos ang tatlong taon sa Batang Quiapo

May sarili nang bahay si Baby Giant, na gumanap bilang si Oweng sa FPJ’s Batang Quiapo. Sa panayam sa Unplugged vlog ni Julius Babao, nagpasalamat siya kay Coco Martin dahil pinili siya para sa karakter at naging bahagi ng grupo ni Tanggol sa serye. Tatlong taon siyang lumabas sa programa bago tuluyang nagpaalam. Ayon kay Baby Giant, una sanang sabay-sabay aalis sa kuwento ang mga kasamahan niya, ngunit iba ang nangyari sa karakter niya dahil siya mismo ang humiling na tapusin na ang papel ni Oweng. Ibinahagi niyang naapektuhan ang kalusugan niya dahil sa kakulangan sa tulog at pagod sa taping. Nagpatingin siya at napansing bumaba ang kaniyang immune system, nagkakaroon siya ng palpitation, at tumaas ang timbang. Aniya, madalas siyang kumain at wala halos pagkakataong mag-ehersisyo maliban sa mga eksenang may takbuhan. Tatlong beses kada linggo ang taping, kaya nahirapan siyang makabawi ng tulog. Sinabi niyang palagi siyang sinusuri ng medic at ipinakita niya sa producer ang kaniyang medical certificate. Ayon sa kaniya, inaprubahan naman ang pag-alis niya matapos niyang ipaliwanag ang sitwasyon. Kwento pa niya, kinausap siya ni Coco tungkol sa eksena ng pagkamatay ni Oweng at tinanong kung kaya pa niyang magpatuloy. Kung gusto raw niyang manatili, maaari nilang balewalain ang eksenang naipalabas na at buhayin muli ang karakter. Gayunman, sinabi ni Baby Giant na mas pinili niyang unahin ang kalusugan dahil hindi niya alam kung ano ang maaaring mangyari kung ipagpapatuloy niya ang nakakapagod na iskedyul.