Bart De Wever iste’foga ariza berdi: Belgiya koalitsiyasi byudjet bo‘yicha kelisha olmadi

Belgiya bosh vaziri Bart De Wever qirol Filipga iste’foga chiqish haqida ariza berdi. Bloomberg xabariga ko‘ra, bunga 2027-yil byudjeti yuzasidan koalitsiya muzokaralari natija bermagani sabab bo‘lgan. Hukumat partiyalari mamlakat xarajatlarini qisqartirish bo‘yicha kelishuvga erisha olmagan. Qirol iste’fo masalasida hozircha qaror chiqarmay, Vazirlar Mahkamasini muzokaralarda murosaga kelishga undadi. Xabarlarga ko‘ra, monarx 3-noyabr kuni koalitsiya partiyalari yetakchilari bilan uchrashadi, 6-noyabrda esa De Wever bilan yana muloqot qiladi. Bosh vazir saroydagi taxminan bir yarim soatlik uchrashuvdan keyin jurnalistlarga izoh bermasdan ketgan. Agar qirol iste’foni qabul qilsa, mamlakatda yangi saylovlar belgilanishi mumkin. Hozircha esa hukumatning kelgusi taqdiri koalitsiya muzokaralari va qirolning qaroriga bog‘liq. Belgiya hukumati 2029-yilgacha byudjetdan qariyb 10 milliard yevro tejash majburiyatini olgan. Biroq tejamkorlik choralarining qanday taqsimlanishi bo‘yicha partiyalar kelisha olmayapti. Liberal Islohotchi harakat soliqlarni oshirishga, jumladan qo‘shilgan qiymat solig‘i tizimini o‘zgartirishga qarshi. So‘l-markazchi guruhlar esa sog‘liqni saqlash va pensiya xarajatlarini qisqartirishni ma’qullamayapti. Manbada keltirilgan prognozga ko‘ra, Belgiya byudjeti taqchilligi 2028-yilda yalpi ichki mahsulotning 5,7 foiziga yetishi mumkin; o‘tgan yili bu ko‘rsatkich 5,2 foiz bo‘lgan. Davlat qarzi 735 milliard yevrodan oshgani, uning iqtisodiyot hajmiga nisbati esa Yevropa Ittifoqi belgilagan 60 foizlik chegaradan ancha yuqori ekani qayd etilgan. De Wever va koalitsiya hamkorlari uzoq davom etgan yig‘ilishda 2029-yilgacha mo‘ljallangan tejamkorlik rejasini kelisha olmagan.