Erik ten Hag Ronaldonu yenidən tənqid etdi: münaqişənin başlanğıcı necə olmuşdu?

Erik ten Hagın Kriştiano Ronaldo barədə yeni açıqlamaları futbol dünyasında onların gərgin münasibətini yenidən gündəmə gətirib. Xarici mediaya istinadən yayılan xəbərə görə, “Mançester Yunayted”in keçmiş baş məşqçisi portuqaliyalı ulduzun son yeddi-səkkiz ildə əvvəlki səviyyəsində çıxış etmədiyini söyləyib. Ten Hag Ronaldonu futbol tarixinin ən böyük oyunçularından biri adlandırsa da, onun fikrincə, “Yuventus”dan sonrakı dövrdə əvvəlki performansını qorumaq mümkün olmayıb. Məşqçi bununla yanaşı, “Real”ın ulduz futbolçularla yolları onların eniş dövrü başlamazdan əvvəl ayırmaq bacarığını tərifləyib. Bu, Ten Hagın Ronaldo haqqında ilk sərt fikri deyil. Məqalədə xatırladılır ki, onların arasında gərginlik 2022-ci ildə, niderlandlı mütəxəssis “Mançester Yunayted”ə rəhbərlik etməyə başlayandan sonra yaranıb. Həmin vaxt Ronaldo komandanın əsas ulduzlarından idi və əvvəlki mövsümdə bütün turnirlərdə 24 qol vurmuşdu. Ten Hag yüksək pressinqə və intizama əsaslanan oyun sistemi qurmaq istəyirdi. Ronaldo isə ailə səbəblərinə görə mövsümöncəsi hazırlığın bir hissəsini buraxmış, daha sonra bəzi oyunlarda ehtiyatda qalmışdı. Mənbənin yazdığına görə, tərəflər arasındakı narazılıq bu dövrdə getdikcə nəzərə çarpmağa başlayıb. İlk açıq gərginlik 2022-ci il iyulun 31-də, “Rayo Valyekano” ilə yoldaşlıq oyunu başa çatmamış Ronaldonun stadionu tərk etməsi ilə bağlı olub. Ten Hag belə davranışı qəbuledilməz sayıb. Oktyabrda isə “Tottenhem”lə matçda əvəzlənmək istəməyən Ronaldo final fitindən əvvəl tunelə yollanıb. Məşqçi onu “Çelsi” ilə növbəti oyunun heyətindən kənarda saxlayıb. Noyabrda Ronaldo Pirs Morqanla müsahibəsində klub rəhbərliyini və Ten Hagı tənqid edib. “Mən ona hörmət etmirəm, çünki o, mənə hörmət etmir”, – deyə futbolçu həmin vaxt bildirmişdi. Məqalədə bu qarşıdurma “Mançester Yunayted” tarixinin ən çox müzakirə olunan məşqçi-oyunçu münaqişələrindən biri kimi təqdim olunur.