Evode Uwizeyimana agaragaje impungenge ku mashanyarazi azima imvura yaguye

Senateri Evode Uwizeyimana yagaragaje ko afite impungenge ku ntego yo kugeza amashanyarazi ku ngo zose mu Rwanda bitarenze mu 2029, anibutsa ko ikibazo atari ukongera gusa umubare w’abafite amashanyarazi, ahubwo ari no kubonera abaturage umuriro wizewe. Yabivuze ubwo Komisiyo y’Ubukungu n’Imari muri Sena yashyikirizaga Inteko Rusange raporo y’igenzura ku bikorwa bya Guverinoma bigamije kugeza amashanyarazi ku baturage. Uwizeyimana yabajije abagize Komisiyo niba, nyuma yo kuganira n’inzego zibishinzwe no kureba ingengabihe y’imishinga, babona ko intego ya 2029 izagerwaho. Yavuze ko igihe gisigaye atari kinini, kandi ko hari n’ikibazo cyo kuzima k’umuriro kigaragara mu bihe bimwe na bimwe. Mu magambo ye, yatanze urugero rw’imvura, avuga ko ishobora gutuma umuriro ubura, ati: “Imvura iragwa ukagira ngo umuriro na wo ugiye kugama.” Senateri Uwizeyimana yasobanuye ko aho atuye mu Karere ka Kicukiro, umuriro ukunda kubura iyo imvura iguye. Yongeyeho ko iyo ahamagaye umukozi wa REG, asubizwa ko insinga z’amashanyarazi zaguye. Ibyo, nk’uko yabigaragaje, bituma yibaza niba umuyoboro uriho uzashobora gutanga umuriro uhamye uko ibikorwa byiyongera. Yavuze kandi ko ubuke bw’amashanyarazi bugaragara cyane mu bice birimo inganda, kandi ko ikibazo gishobora kurushaho kugaragara uko ibinyabiziga bikoresha amashanyarazi bizagenda byiyongera. Perezida wa Komisiyo, Senateri Fulgence Nsengiyumva, yasubije ko nta mpamvu yo gukeka ko intego itazagerwaho, ashingiye ku kongera ubushobozi bwo kubyaza no gutanga umuriro. Yavuze ko ubwo bushobozi bwavuye kuri Megawatt 406 mu 2024 bukagera kuri 472.4, kandi ko imishinga umunani iri gukorwa ishobora kongeraho Megawatt 523. Visi Perezida wa Komisiyo, Senateri Dr. Nyinawamwiza Laetitia, na we yavuze ko intego yo kugeza amashanyarazi kuri bose iri kugerwaho. Yagaragaje ko ubu abaturage bagerwaho n’amashanyarazi bangana na 88.3%, kandi ko mu 2029 ubushobozi bw’igihugu bushobora kuba hafi gukuba kabiri.