Hamis Kigwangalla akataa kuwania uenyekiti wa Simba, asema anatamani kununua hisa

Dk Hamis Kigwangalla amesema hana mpango wa kuwania nafasi ya uenyekiti wa klabu ya Simba katika uchaguzi mkuu unaotarajiwa kufanyika Januari 30, 2026. Badala yake, mwanasiasa huyo amesema angependa kuwa mwekezaji kwa kununua hisa za klabu hiyo. Kauli yake imefuatia wanachama na mashabiki wa Simba kumtaja kama mtu anayeweza kuwania uenyekiti, huku baadhi ya vyombo vya habari vikianza kuandika kuhusu uwezekano huo. Katika ujumbe alioweka Instagram, Kigwangalla aliwashukuru waliompa moyo na kusema kuwa hana mpango wa kugombea nafasi yoyote ya uongozi ndani ya Simba au mahali pengine kwa sasa. Amesema kuwa matarajio yake kuhusu klabu hiyo ni kushiriki kama mwekezaji, si kama kiongozi. Alifafanua pia kuwa kwa sasa anajipa nafasi ya kutafakari na kuelekeza nguvu kwenye mambo yake binafsi. Kigwangalla amesema awali alihimizwa kugombea Ubunge wa Afrika Mashariki na wabunge kadhaa, ambao baadhi yao walijitolea kumsaidia kwenye kampeni. Hata hivyo, alishukuru kwa kuungwa mkono lakini hakuliona kuwa jambo analopaswa kulifuatilia. Vilevile, alisema watu wa Tabora wamekuwa wakimtaka ajipange kwa nafasi za uongozi ndani ya chama mkoani, lakini hajakubali mwito huo. Kwa mujibu wa Kigwangalla, anatafakari tofauti kati ya kutumia muda na nguvu katika huduma kwa wengine na kujenga urithi kwa ajili ya familia yake, hasa wajukuu. Alisema uongozi wa umma, chama au taasisi unaweza kuhitaji kujitoa na kujitolea, na wakati mwingine ukachelewesha mipango ya mtu binafsi na ya familia. Katika uchaguzi ujao wa Simba, nafasi zitakazopigiwa kura ni ya uenyekiti na nafasi tano za wajumbe wa Bodi ya Wakurugenzi.