Hussein Mwinyi: AI isaidie watumishi wa umma, lakini isichukue nafasi ya maamuzi ya binadamu

Rais wa Zanzibar, Dk Hussein Mwinyi, amesema Akili Unde (AI) inaweza kusaidia kuboresha utumishi wa umma barani Afrika, lakini haipaswi kuchukua nafasi ya fikra, busara na uwajibikaji wa watumishi na viongozi. Kauli hiyo aliitoa alipofungua mkutano wa 11 wa Mtandao wa Mameneja wa Rasilimaliwatu katika Utumishi wa Umma Barani Afrika (APS-HRMNET), uliofanyika Unguja. Hotuba ya Mwinyi, iliyosomwa na Makamu wa Kwanza wa Rais Othman Masoud, ilieleza kuwa serikali haiwezi kuwa na ufanisi bila kuwa na watumishi wenye weledi, nidhamu na uadilifu. Alisisitiza kuwa teknolojia inapaswa kuwa nyenzo ya kuwasaidia watumishi kufanya kazi kwa ufanisi zaidi, badala ya kuwa mbadala wa uamuzi na dhamana yao. Kwa mujibu wa Mwinyi, AI inaweza kusaidia kuchambua taarifa kwa haraka, kuandaa nyaraka, kuboresha mawasiliano, kusimamia kumbukumbu za watumishi na kubaini mahitaji ya mafunzo. Hata hivyo, alisema teknolojia pekee haiwezi kuleta maendeleo bila watu wenye maarifa na uwezo wa kuitumia ipasavyo. Alionya kuwa matumizi ya AI yanapaswa kuzingatia sheria, haki za wananchi, usalama wa taarifa na uwazi wa maamuzi. Pia alieleza kuwa mameneja wa rasilimaliwatu wanapaswa kuwa na nafasi kubwa katika kupanga mahitaji ya ujuzi na mustakabali wa taasisi, badala ya kujikita katika majukumu ya kawaida kama ajira, mishahara na kumbukumbu. Mkutano huo, uliohudhuriwa na washiriki 1,140 kutoka nchi 21, ulikuwa na kaulimbiu kuhusu kuwezesha mageuzi ya kimkakati ya rasilimaliwatu katika utumishi wa umma kwa kutumia AI. Mwinyi alisema vijana wa Afrika, kutokana na vipaji na ari yao ya kujifunza teknolojia, ni fursa muhimu kwa mageuzi hayo.