Jacques Randrianasolo, nodimandry ilay minisitry ny Fitsarana teo aloha

Misaona ny tontolon’ny fitsarana eto Madagasikara taorian’ny nahafatesan’i Jacques Randrianasolo, minisitry ny Fitsarana sy Mpitahiry ny Tombokasem-panjakana teo aloha. Araka ny tatitra, nodimandry omaly ilay mpitsara za-draharaha, izay nanokana 42 taona niasany ho amin’ny lalàna sy ny raharaham-pitsarana. Nandritra ny asany, nitana andraikitra ambony maro izy. Anisan’izany ny maha-mpampanoa lalàna jeneraly azy teo anivon’ny Fitsarana Ambony Antananarivo. Voalaza fa nisongadina tamin’izany andraikitra izany ny fahamatorany sy ny firosoany amin’ny asa amim-pitandremana. Tamin’ny taona 2014, nifidy azy ho solontenan’ny mpitsara tao amin’ny Filankevitra Ambonin’ny Mpitsara, na CSM, ireo namany. Nitarika azy ho eo amin’ny fitantanana ny minisiteran’ny Fitsarana ny lalana nodiaviny: notendrena ho amin’izany andraikitra izany izy tamin’ny 24 Janoary 2019, tao anatin’ny governemanta notarihin’i Christian Ntsay. Nijanona teo amin’ny toerany hatramin’ny Janoary 2020 izy. Nandritra ny fotoam-piasany tao amin’ny governemanta, araka ny loharanom-baovao, nifantoka tamin’ny ady amin’ny kolikoly, ny fanatsarana ny rafi-pitsarana ary ny fiarovana ny fahaleovantenan’ny fitsarana ny lahateniny sy ny asany. Tsy manome antsipiriany momba ny antony nahafatesany ilay tatitra. Malahelo ny fianakavian’ny fitsarana noho ny fahalasanan’ilay mpitsara sy mpitantana efa za-draharaha. Naneho fiaraha-miory tamin’ny fianakaviany ny gazety Midi Madagasikara, sady nilaza fa haharitra eo amin’ny fahatsiarovana ny asa sy ny fanoloran-tenany ho an’ny rafitra ara-pitsarana ny dian’i Jacques Randrianasolo.