Leo Qabriadze atasının yenilənmiş tamaşasını Bakıda təqdim etdi

Gürcü rejissoru Leo Qabriadze Bakıda atasının müəllifi olduğu “Alfred və Violetta” tamaşasının yeni quruluşunu təqdim edib. Kulis.az-ın APA-ya istinadən yaydığı məlumata görə, Rezo Qabriadzenin yazıb ilk dəfə səhnəyə qoyduğu əsər yenilənmiş versiyada yenidən tamaşaçıların qarşısına çıxıb. Tamaşa üzərində son dəyişiklikləri Rezo Qabriadze 2021-ci ildə vəfat etməzdən əvvəl edib. Yeni səhnə versiyasını isə oğlu Leo tamamlayıb. O, jurnalistlərə açıqlamasında teatrın 46 yaşının tamam olduğunu və kollektivin Bakı səfərindən məmnun qaldığını deyib. Rejissor paytaxtda sonuncu dəfə 1982-ci ildə olduğunu xatırladıb, şəhərin dəyişdiyini və gözəlləşdiyini bildirib. Leo Qabriadze Bakıda mehriban qarşılandıqlarını vurğulayaraq festivalın dəvətinə görə təşəkkür edib. Onun sözlərinə görə, “Alfred və Violetta” 1981-ci ildə teatrın açılışında ilk tamaşa kimi göstərilib və bir neçə il repertuarda qalıb. Təxminən altı-yeddi il əvvəl Rezo Qabriadze pyesi yenidən işləyib, hadisələrin vaxtını 1981-ci ildən 1991-ci ilə keçirib. Leo da 1990-cı ildə Gürcüstanı tərk edərək ABŞ-yə köçdüyünü, buna görə əsərin baş qəhrəmanına özünü yaxın hiss etdiyini söyləyib. Yenilənmiş tamaşanın dünya premyerası 2022-ci ilin fevralında Venesiyanın Teatro Goldoni səhnəsində keçirilib. Mənbənin bildirdiyinə görə, əsər tamaşaçıların və teatr tənqidçilərinin diqqətini cəlb edib. İtaliyanın “La Nuova” nəşri tamaşaya dair yazısında yumorla kədərin birləşməsini və kuklaların yaratdığı canlı, duyğulu aləmi xüsusi qeyd edib.