Mariya Yohana asobanuye amateka ya ‘Indinde’ imaze imyaka isaga 30

Mariya Yohana
Indirimbo ‘Indinde’ imaze imyaka isaga 30 ikomeje kumvikana mu birori no mu bandi bayikunda. Nubwo bamwe mu rubyiruko bayumva kenshi bakaba bazi n’amagambo yayo, hari abibwiraga ko Mariya Yohana yayisohoye vuba aha. Umuhanzikazi yavuze ko atari nshya, ahubwo yayikoze mu bihe by’urugamba rwo kubohora Igihugu, nyuma ikavugururwa mu njyana kugira ngo ikomeze kugera ku bantu benshi. Mu kiganiro yagiranye na Imvaho Nshya, Ngoga Richard yavuze ko yakundaga kuyumva ariko atazi ko imaze igihe kirekire. Yasobanuye ko yayibonagamo injyana ibyinitse n’ubutumwa bwiza, ku buryo yumvaga ari indirimbo nshya umuhanzi yari aherutse gushyira hanze. Umwiza Teta Christa na we yavuze ko ‘Indinde’ ari mu ndirimbo akunda cyane. Yatangaje ko hari igihe ayumva mbere yo kuryama, kandi ko abona ubutumwa bwayo n’injyana yayo bikora ku rubyiruko. Abandi bayimenyereye bayumvanye amatsinda ayisubiramo, bituma bamwe batamenya neza ko ari iya Mariya Yohana. Tunga yavuze ko yayumvise bwa mbere mu myaka ine cyangwa itanu ishize, ayumvanye Inzora Band. Icyo gihe ntiyari azi neza uyihimbye. Yavuze kandi ko yumva ubutumwa bwayo bujyanye n’inshingano zo kwita ku babyeyi bareze abana, bakabigomwa kugira ngo bazagire ejo hazaza heza. Yongeyeho ko indirimbo yamufashije gusobanukirwa imvugo igira iti ‘Indinda ni kabiri, ndinda Dawe na ndinda mwana’. Mariya Yohana yasobanuye ko yayihimbye mu gihe abana bari bamaze gutsinda urugamba, bakabwira abari barwitangiye ko na bo bazabarinda. Bityo, nubwo uburyo bw’injyana bwaje kuvugururwa, amagambo n’ubutumwa by’iyi ndirimbo bikomeza kumvikana no mu bayumvise nyuma y’imyaka myinshi.
Sursa ↗