Meghan Markle otasi bilan aloqani uzgani haqidagi maktub tafsilotlari ma’lum bo‘ldi

Meghan Markle 2025-yilda otasi Tomas Marklga maktub yo‘llab, ular o‘rtasidagi munosabatlarga chek qo‘yganini bildirgan. BBC manbalariga ko‘ra, gersoginya xatda otasiga nisbatan ilgari surilgan og‘ir ayblovlardan tegishli idoralar xabardor ekanini yozgan. Maktub Tomas Marklning oyog‘i amputatsiya qilinganidan keyin, u Filippindagi shifoxonada bo‘lgan paytda yuborilgani aytilmoqda. The Sun e’lon qilgan maktub tafsilotlarida Meghan otasiga farzandlari Archi va Lilibet bilan uchrashish imkoniyati bo‘lmasligini, bundan buyon u bilan aloqa qilmasligini bildirgani keltiriladi. BBC xabariga ko‘ra, ularning munosabatlari 2018-yilda sovuqlashgan. O‘shanda Tomas Markl sog‘lig‘i yomonlashganini aytib, qizining to‘yida qatnashmagan. Maqolada Tomas Marklning o‘gay o‘g‘li Kichik Tomas Markl uning Filippindagi eski uyidan bolalarga nisbatan zo‘ravonlik aks etgan tasvirlar topilgani haqida xabar bergani aytiladi. U bu borada politsiyaga murojaat qilganini bildirgan. Tomas Markl esa o‘ziga qo‘yilgan ayblovlarni rad etmoqda. Filippin rasmiylari mazkur masalani tekshirayotganini tasdiqlagan. Mamlakat ichki ishlar vaziri Jonvik Remulla politsiya Tomas Marklning kompyuterini olib, raqamli ekspertiza o‘tkazishini ma’lum qilgan. Maqolada AQSH Federal qidiruv byurosi ham ayblovlardan xabardor ekani qayd etiladi. Kichik Tomas Markl esa intervyuda avval otasining tarafini olgani uchun Meghandan uzr so‘ragan.