Museveni yakuye mu mirimo Abanyamabanga Bahoraho 11, abandi ahindurira imyanya

Perezida wa Uganda, Yoweri Kaguta Museveni, yahinduye imiterere y’ubuyobozi mu nzego zitandukanye za Leta, asezerera Abanyamabanga Bahoraho 11, abandi 13 abaha inshingano nshya, mu gihe 11 bimuriwe mu zindi nzego. Abandi 16 bo bagumye ku myanya bari basanzweho, nk’uko inkuru ibivuga. Impinduka zatangajwe ku wa 9 Ugushyingo 2026, zireba za minisiteri zirimo Imari, Ububanyi n’Amahanga, Ubuzima, Ingabo, Ubuhinzi, Ubucuruzi n’Ubutabera, ndetse n’ibindi bigo bya Leta. Mu basezerewe harimo Pius Bigirimana, wari Umunyamabanga Uhoraho muri Minisiteri y’Ubutabera; Maj Gen David Kasura-Kyomukama wari mu y’Ubuhinzi; na Waiswa Bageya wari mu y’Ibikorwa Remezo n’Ubwikorezi. Nk’uko Chimpreports yabitangaje, Museveni ntiyasobanuye impamvu zihariye zatumye abo bayobozi bakurwa ku mirimo. Ibiro bye byavuze ko impinduka zigamije kongera ubushobozi bw’inzego za Leta, kunoza imikorere no kwihutisha gahunda z’iterambere. Guverinoma ivuga ko zizafasha gukuraho inzitizi z’ubuyobozi no kunoza serivisi zihabwa abaturage. Icyakora, umuyobozi w’Umuryango w’Abavoka muri Uganda, Isaac K. Ssemakadde, yanenze uburyo bamwe mu bayobozi bashyizwe mu myanya. Yavuze ko Museveni yagombaga kubanza gusaba Komisiyo ishinzwe Abakozi ba Leta kubasuzuma, aho kwihitiramo abo ashyira muri iyo myanya. Ssemakadde yagaragaje ko ingingo ya 174 y’Itegeko Nshinga rya Uganda yo mu 1995 ivuga ko Perezida ashyiraho Abanyamabanga Bahoraho agendeye ku nama za Komisiyo ishinzwe Abakozi ba Leta. Ikinyamakuru kivuga ko Museveni yashingiye ku bubasha ahabwa n’ingingo ya 99 na 172, mu gihe Abavoka bagaragaje impungenge ku kuba uburyo bwakoreshejwe bushobora kutajyana n’Itegeko Nshinga n’ubwigenge bw’inzego za Leta.