Paris Jackson yasabye urukiko gushyira miliyoni 600 z’amadolari mu kigega cy’abana ba Michael Jackson

Paris Jackson yasabye urukiko rwo muri Los Angeles gutegeka ko miliyoni 600 z’amadolari ava mu mutungo wa se, Michael Jackson, zishyirwa mu kigega cy’umuryango kigenewe kumufasha na basaza be, Prince na Bigi. Nk’uko bigaragara mu busabe bwatanzwe mu rukiko, amafaranga agenewe abana ntiyashyirwa muri icyo kigega mu gihe cy’imyaka irenga 17, nubwo umutungo wa se wakomeje kwinjiza menshi binyuze mu bikorwa n’amasezerano y’ubucuruzi. Paris ashingira ku buryo umurage wari warateguwe, aho abana bari kuzajya bahabwa inyungu ku migabane yabo buri wese amaze kugira imyaka 21. Ubu, nk’uko ubusabe bubivuga, Prince ari hafi kugira imyaka 30, Paris na we akaba ateganya kuzuza imyaka 29 muri Mata 2027, mu gihe Bigi azaba yujuje imyaka 25 muri Gashyantare 2027. Michael Jackson yapfuye ku wa 25 Kamena 2009, asiga abana batatu. Kuva icyo gihe, umutungo we ucungwa n’ababishinzwe, ukomeza kwinjiza amafaranga ava mu muziki, mu burenganzira ku bihangano bye no mu yandi masezerano y’ubucuruzi. Icyo Paris asaba kiragarura impaka ku gihe abana bagomba guhabwa amafaranga yabo, uko umurage ucungwa n’uburenganzira bw’abazungura ku migabane yabo. Urukiko rutegerejweho gufata icyemezo ku wa 4 Ukuboza. Ruzasuzuma niba ubusabe bwa Paris bwemerwa, niba hari andi mafaranga agomba kugenwa, cyangwa niba hakenewe kubanza gukemura ibibazo by’amategeko bikiri mu nzira. Ibyo ni byo bizagaragaza uko umutungo wagenewe abana ba Michael Jackson uzakomeza gucungwa.