Paul Kagame yagiranye ibiganiro n’abayobozi bitabiriye CHOGM 2026

Perezida Paul Kagame yagiranye ibiganiro n’abayobozi batandukanye bitabiriye inama ya CHOGM 2026, nk’uko Ibiro by’Umukuru w’Igihugu, Village Urugwiro, byabitangaje mu itangazo ryashyizwe hanze ku wa 3 Ugushyingo 2026. Muri abo bayobozi harimo Minisitiri w’Intebe wa Antigua and Barbuda, Gaston Browne, wakiriye iyi nama, Philip Davis wa Bahamas na Harini Amarasuriya wa Sri Lanka. Itangazo rivuga ko Kagame yanahuye na Godwin Friday uyobora Guverinoma ya St. Vincent and the Grenadines, ndetse na Russell Mmiso Dlamini wa Eswatini. Village Urugwiro yanavuze ko Perezida Kagame yitabiriye ibiganiro bya mbere byihariye by’Abakuru b’Ibihugu na za Guverinoma muri iyi nama. Yari kumwe na Gaston Browne n’abandi bayobozi bakuru bo muri Commonwealth. Ibiganiro byabereye mu muhezo, byibanda ku bibazo ibihugu bihuriyeho no kureba uko byafatanya. CHOGM 2026 ifite insanganyamatsiko igira iti: “Kwihutisha ubufatanye n’ishoramari bigamije kubaka Commonwealth iteye imbere.” Inama yahuje Abakuru b’Ibihugu na za Guverinoma 30, abayobozi mu nzego za Leta, abikorera, imiryango itari iya Leta n’urubyiruko. Commonwealth igizwe n’ibihugu 56, u Rwanda rukaba rwarayinjiyemo mu 2009. Rwakiriye CHOGM mu 2022, icyo gihe Perezida Kagame ahabwa inshingano zo kuyobora uyu muryango kugeza mu Ukwakira 2024. Inama ya mbere ya CHOGM yabereye muri Singapore mu 1971, isimbura izari zisanzwe zihuza ba Minisitiri b’Intebe b’ibihugu byari bifitanye amateka n’u Bwongereza.