Paul Scholes: “Mançester Yunayted”in səssiz dahisinin futbolda yazdığı tarix

Meydanda sakitliyi, diqqət çəkmək üçün nümayişlərdən uzaq durması ilə tanınan Paul Scholes top ayağına gələndə oyunun axarını dəyişə bilirdi. Dəqiq ötürmələri, uzaq məsafədən zərbələri və meydanı oxumaq bacarığı onu İngiltərə futbolunun yaddaqalan yarımmüdafiəçilərindən birinə çevirib. Bu dəfə onun həyat və karyera yoluna nəzər salırıq.
Scholes 1974-cü il noyabrın 16-da Salfordda dünyaya gəlib. Ailəsi o, körpə ikən Mançester yaxınlığındakı Lenqliyə köçüb. Uşaqlıqdan futbola maraq göstərən Scholes məktəb illərində kriketdə də bacarığı ilə seçilsə də, gələcəyini futbolla bağlamağa qərar verib. Mənbənin yazdığına görə, astma ilə bağlı çətinliklər yaşaması da idmanla məşğul olmasına mane olmayıb.
14 yaşında “Mançester Yunayted”də məşqlərə qatılan futbolçu 1991-ci ildə klubun gənclər komandasına qoşulub. O, sonradan “Class of ’92” adı ilə tanınan nəslin nümayəndələrindən olub; həmin qrupda Devid Bekhem, Rayan Giqqz və Qari Nevill də yer alırdı. Onların yetişməsində baş məşqçi Aleks Ferqyusonun mühüm rolu olduğu qeyd edilir.
Scholes 1994-cü ildə əsas komandada debüt edib və ilk rəsmi oyununda “Port Veyl”ə qarşı iki qol vurub. Əvvəl hücum xəttində çıxış etsə də, sonralar yarımmüdafiənin mərkəzində möhkəmlənib. Onun oyunu dəqiq ötürmələr, topa nəzarət və uzaqdan təhlükəli zərbələrlə seçilirdi. Zinəddin Zidanın da Scholesun futbol keyfiyyətlərini yüksək qiymətləndirdiyi bildirilir.
Karyerasının mühüm mərhələlərindən biri 1998/99 mövsümü olub. “Mançester Yunayted” həmin il İngiltərə Premyer Liqasını, ölkə kubokunu və UEFA Çempionlar Liqasını qazanaraq trebl edib. Bununla belə, Scholes “Bavariya” ilə finalda meydana çıxa bilməyib: “Yuventus”la yarımfinalın cavab oyununda aldığı sarı vərəqə onun həlledici görüşü buraxmasına səbəb olub. Roy Kin də eyni səbəbdən finalda oynamayıb.
Mənbə ↗