Prince Harry, dama pa rin ang ugnayan kay Princess Diana sa pamamagitan ng charity work

Sinabi ni Prince Harry na nararamdaman pa rin niya ang koneksiyon sa yumaong ina niyang si Princess Diana, lalo na sa mga gawaing pinili niyang suportahan. Sa panayam niya sa GQ, ibinahagi ng Duke of Sussex na may mga pagkakataong dama niya ang presensiya o lakas ng kaniyang ina sa ilang yugto ng kaniyang buhay. Ayon kay Harry, umaasa siyang maipagmamalaki ni Diana ang mga proyektong pinaglalaanan niya ng panahon at lakas. Napansin din niyang kahawig ng mga gawaing pinili niya ang mga adbokasiyang tinutukan noon ng kaniyang ina. Aniya, hindi niya agad napagtanto na mahihila siya sa mga katulad na layunin habang hinahanap ang sarili niyang paraan para ipagpatuloy at pangalagaan ang iniwang pamana ni Diana. Sa parehong panayam, tinalakay rin ni Harry ang dating pakiramdam ng pagkakasala tuwing nakararanas siya ng saya kahit wala na ang kaniyang ina. Inamin niyang matagal siyang naging manhid sa emosyon dahil inakala niyang kailangan niyang manatiling malungkot upang patunayan kung gaano niya nami-miss si Diana. Nagbago ang pananaw niya nang maunawaan niyang nais lamang ng kaniyang ina na maging masaya siya. Sinabi niyang nakatulong ang pagkaunawang iyon upang magkaroon siya ng ibang pagtingin sa buhay. Nabanggit din sa ulat ang kamakailang pagbabalik ni Harry, ng asawang si Meghan Markle at ng kanilang dalawang anak sa United Kingdom matapos manirahan sa Estados Unidos nang anim na taon. Ayon sa panayam, kabilang sa mga dahilan ng pagbabalik ang kagustuhang maranasan nina Prince Archie at Princess Lilibet ang edukasyon sa Britanya.