Samia Suluhu Hassan kuelekea Uturuki kushiriki mkutano wa COP31

Rais Samia Suluhu Hassan anatarajiwa kushiriki mkutano wa 31 wa Nchi Wanachama wa Mkataba wa Umoja wa Mataifa kuhusu Mabadiliko ya Tabianchi, utakaofanyika Antalya, Uturuki. Kwa mujibu wa taarifa iliyotolewa na Ikulu, Samia anaondoka nchini kuelekea mkutanoni Novemba 10, 2026. Mkutano wa COP huwakutanisha wawakilishi wa nchi wanachama kujadili utekelezaji wa makubaliano na mikakati ya kukabiliana na mabadiliko ya tabianchi. Msingi wake ni Mkataba wa Umoja wa Mataifa kuhusu Mabadiliko ya Tabianchi, uliopitishwa mwaka 1992 katika mkutano wa mazingira na maendeleo uliofanyika Rio de Janeiro, Brazil. COP ya kwanza ilifanyika Berlin mwaka 1995. Taarifa ya safari ya Rais Samia imetiwa saini na Mkurugenzi wa Mawasiliano ya Rais Ikulu, Bakari Machumu. Akiwa Antalya, Rais anatarajiwa kuhutubia mkutano wa wakuu wa nchi na Serikali na kushiriki kikao cha ngazi ya juu kuhusu matumizi ya nishati safi ya kupikia barani Afrika. Ratiba yake pia inajumuisha mazungumzo na mwenyeji wa mkutano, Rais wa Uturuki Recep Tayyip Erdogan. COP31 itajadili hatua za kupunguza uzalishaji wa gesi chafu na namna ya kukabiliana na athari za mabadiliko ya tabianchi, kwa mujibu wa taarifa hiyo.