Samir Paul Kapur Türkmenistanda işewürler bilen söwda we maýa goýum mümkinçiliklerini maslahatlaşdy

ABŞ-nyň Günorta we Merkezi Aziýa boýunça Döwlet departamentiniň kömekçi sekretarynyň orunbasary Samir Paul Kapur Türkmenistana saparynyň dowamynda ýerli işewür toparlaryň wekilleri bilen duşuşdy. ABŞ-nyň Türkmenistandaky ilçihanasynyň habaryna görä, gepleşiklerde iki ýurduň arasyndaky söwda gatnaşyklaryny ösdürmegiň we maýa goýum mümkinçiliklerini giňeltmegiň ýollary ara alnyp maslahatlaşyldy. Kapur Aşgabatdaky Amerikan merkezine hem baryp gördi. Ol ýerde türkmen raýatlary üçin hödürlenýän mugt maksatnamalar bilen tanyşdy: iňlis dili sapaklary, hünär endiklerini ösdürmek, telekeçilik boýunça okuwlar we amerikan medeniýetine bagyşlanan çäreler. Resminiň sapary täze ABŞ ilçihanasynyň toplumynyň gurluşyk meýdançasyna baryp görmek bilen hem dowam etdi. Saparyň çäklerinde Kapur Türkmenistanyň Halk Maslahatynyň Başlygy we türkmen halkynyň Milli Lideri Gurbanguly Berdimuhamedow bilen duşuşdy. Ilçihananyň maglumatyna görä, olaryň söhbetdeşliginde Türkmenistan bilen ABŞ-nyň häzirki gatnaşyklary we geljekde hyzmatdaşlygy ösdürmegiň mümkinçilikleri gozgalypdyr. Saparyň soňunda diplomat ABŞ-nyň ilçihanasynyň işleri wagtlaýyn ynanylan wekili Kristin Hawkinsiň kabul edişligine gatnaşdy. Çärä Türkmenistanyň döwlet edaralarynyň, iki ýurduň işewür toparlarynyň wekilleri, ABŞ-nyň hökümet maksatnamalaryna gatnaşan uçurymlar hem-de diplomatik korpusyň agzalary ýygnandy. Kapur ABŞ bilen Türkmenistanyň arasyndaky diplomatik gatnaşyklaryň soňky ýyllarda giňelýändigini belledi. Saparyň dowamynda ara alnyp maslahatlaşylan meseleler onuň resmi iş maksatnamasynyň bir bölegi boldy; çeşme duşuşyklaryň netijesinde anyk ylalaşyklaryň gazanylandygyny habar bermeýär.