Thierry Murangira asobanuye uko amafaranga y’umushinga w’amazi yakoreshejwe nabi i Gisagara

Umuvugizi wa RIB, Thierry Murangira, yatanze ibisobanuro bishya ku iperereza ku mafaranga yari agenewe kugeza amazi ku Ishuri Ribanza rya Mukomacara, mu Karere ka Gisagara. Nk’uko yabitangaje, miliyoni 23 z’amafaranga y’u Rwanda muri miliyoni 28 zivugwa ko zanyerejwe zimaze kugaruzwa, mu gihe iperereza rigikomeje. Murangira yavuze ko amafaranga yatanzwe n’umuterankunga kugira ngo amazi agezwe ku ishuri, ariko umushinga ntushyirwe mu bikorwa uko wari wateganyijwe. Uwo muterankunga ngo yabanje kubwirwa ko amazi yagejejwe ku kigo, ariko nyuma agarutse asanga nta mazi ahari, atangira gushaka ibisobanuro. Iperereza ryagaragaje ko Padiri Kayumba Maurice, ukorera muri Paruwasi ya Kansi, yari yashinzwe kwakira ayo mafaranga kubera icyizere yari afitiwe. Aho kubaka umuyoboro uhuye n’ibyari byateganyijwe, ngo amazi yakuwe mu kigega cya WASAC kitari gifite amazi ahagije, hanyuma hatangwa raporo ivuga ko umushinga warangiye. Mu gihe cyo gutaha ishuri, ngo Padiri Kayumba yatanze ibihumbi 200 Frw kugira ngo amazi avomwe ashyirwe mu kigega, bityo abari bitabiriye ibirori babone ko ikigo gifite amazi. Nyuma y’aho, umuterankunga yongeye gusura ishuri asanga nta mazi ahari, ubuyobozi bwaryo bumusobanurira ko amazi yari yazanywe by’agateganyo ku munsi w’ibirori. Umuterankunga yagejeje ikibazo kuri Visi Meya ushinzwe imibereho myiza, Dusabe Denise, amusaba kugikurikirana. Murangira yavuze ko Dusabe yahamagaye Padiri Kayumba ngo amusabe ibisobanuro, ariko iperereza rigaragaza ko ikibazo kitakurikiranwe uko bikwiye. Abafashwe bakekwaho kugira uruhare muri dosiye barimo Dusabe Denise, Padiri Kayumba, umuyobozi wa RIB mu Karere ka Gisagara Rangira Anicet na Nkurunziza Octave, uvugwa nk’umukomisiyoneri. RIB ivuga ko iperereza rikomeje kugira ngo hamenyekane uruhare rwa buri wese n’uko amafaranga yasohotse.