Vivienne Jolie flet për shtrimin në spital dhe betejën me çrregullimin e të ngrënit

Vivienne Jolie ka rrëfyer se u shtrua në spital në fillim të këtij viti, pasi po përballej me një çrregullim të të ngrënit dhe vështirësi të shëndetit mendor. Vajza e Angelina Jolie dhe Brad Pitt e ndau përvojën në një deklaratë personale, të paraqitur në një ekspozitë me fotografi dhe vepra artistike në Los Angeles. Në tekstin e titulluar “Fusha e Tulipanëve”, Vivienne shkroi se në spital ishte ndier e zemëruar, e sëmurë dhe shumë e vetmuar. Ajo shpjegoi se kishte pasur vështirësi edhe me shëndetin mendor dhe vendosi të fliste publikisht për periudhën e rëndë, me shpresën se rrëfimi i saj mund t’i kujtojë dikujt tjetër se nuk është i vetëm ose ta nxisë të kërkojë ndihmë. Sipas deklaratës së saj, mirësia e pacientëve të tjerë dhe e stafit shëndetësor e ndihmoi të kalonte ditët më të vështira. Vivienne tha se përvoja e ndryshoi: në spital qeshi dhe qau më shumë se kurrë, ndërsa gjeti mënyra të reja për të qenë e sinqertë me veten. Ajo vlerësoi edhe fëmijët e tjerë, të cilët, sipas saj, i treguan se mund të gjendet forcë edhe kur njeriu ndihet më i dobët. Ekspozita, e quajtur “Fusha e Tulipanëve: Një galeri mbi Durimin e Pacientëve”, u mbajt nga 2 deri më 8 nëntor në galerinë Forager Crafts. Emri, sipas Vivienne, lidhet me spitalin ku u trajtua. Fotografitë e ekspozuara pasqyronin ndjenja dhe kujtime nga ajo periudhë: trishtim, të qeshura, siguri dhe guxim. Ajo shpjegoi se gjatë qëndrimit në spital nuk u bënë fotografi, ndaj imazhet e krijuara më vonë shërbyen për të ruajtur kujtimet e asaj kohe. Në një postim në Instagram më 21 tetor, Vivienne kishte njoftuar ekspozitën dhe kishte publikuar një poster shumëngjyrësh me vizatimin e një luleje që mban një telefon. Një burim i cituar nga Page Six tha se asaj i ishte dashur guxim për ta bërë publike një përvojë kaq personale.