Xander Ford, humingi ng tawad kay Kathryn Bernardo sa paninira kapalit ng P5,000

Naglabas ng bukas na liham si Xander Ford para humingi ng tawad kay Kathryn Bernardo. Sa Facebook post niya, inamin ng social media personality na nagpagamit siya noon sa mga taong nag-udyok sa kanyang magsalita nang masama tungkol sa ilang personalidad, kapalit umano ng P5,000. Kabilang sa mga taong naapektuhan ng kanyang mga pahayag si Kathryn. Ayon kay Xander, labis niyang pinagsisisihan ang mga ginawa niya noong mas bata pa siya. Sinabi niyang nauto at nagamit siya para manakit sa pamamagitan ng mga salitang hindi maganda, at hindi niya inasahan kung gaano kabigat ang magiging epekto ng mga desisyong iyon sa kanyang buhay. Sa liham, nilinaw niyang hindi niya hinihiling na kalimutan agad ni Kathryn ang nangyari. Ang nais lamang daw niya ay magkaroon ng pagkakataong humingi ng tawad nang personal at maipakita ang paggalang na matagal na niyang gustong ipahayag. Umaasa rin siyang balang araw ay makakausap niya ang aktres, kahit hindi bilang kaibigan kundi bilang taong humahanga at gumagalang sa kanya. Sinabi pa ni Xander na wala raw siyang tunay na intensiyong manakit o magsalita ng masama laban sa kapwa. Gayunman, kinilala niya ang pagkakamali at ang katotohanang hindi na mababago ang nakaraan. Sa halip, nangako siyang magbabago at babangon mula sa mga pinagsisisihan niya. Inilarawan niya bilang malaking pagbabago sa buhay niya ang pagsisikap na magtagumpay at magkaroon ng pagkakataong humingi ng tawad kay Kathryn. Tinapos ni Xander ang mensahe sa pagbati ng Maligayang Pasko at Bagong Taon, at pasasalamat sa saya, inspirasyon at magagandang alaalang naibibigay umano ng aktres sa maraming tao.