Zuhra Soliyeva tomoshabinlar unga yopishtirgan obrazdan qutulish oson emasligini aytdi

Aktrisa, xonanda va teleboshlovchi Zuhra Soliyeva “Chotki TV” YouTube kanaliga bergan intervyusida ijodi va tomoshabinlar orasida shakllangan qiyofasi haqida gapirdi. Uning aytishicha, “Boyvachcha” filmidagi roli sabab ko‘pchilik uni hayotda ham keskin gapiradigan, janjalkash ayol deb o‘ylaydi. Soliyeva esa bu tasavvurdan ranjishini bildirdi. San’atkorning so‘zlariga ko‘ra, aynan shu obraz uni keng auditoriyaga tanitgan. Film muvaffaqiyatidan keyin tadbirlar va to‘ylarga takliflar ko‘paygan, bu esa daromadiga ham ta’sir qilgan. Shu sababli u bir muddat sahnadagi qiyofasini davom ettirishga qarshi bo‘lmaganini aytdi. Biroq Soliyeva o‘sha paytdayoq tomoshabinlarga bu uning haqiqiy fe’l-atvori emas, balki ekran va sahna uchun yaratilgan obraz ekanini tushuntirishi kerak bo‘lganini tan oldi. Uning ta’kidlashicha, ayrimlar u bilan yaqindan tanishib, kundalik hayotda butunlay boshqacha inson ekanini keyin anglaydi. Aktrisa ijtimoiy tarmoqlarda hamon tashqi ko‘rinishi va hatto kulish tarziga doir fikrlar yozilishini aytdi. Shunday bo‘lsa-da, odamlar ongiga singib qolgan tasavvurni o‘zgartirish oson emas, deya qo‘shimcha qildi u. Soliyeva kelajakda ijodining boshqa qirralarini ham ko‘rsatishni istashini bildirdi. Uning fikricha, tarixiy yoki yirik davlat filmlarida rol o‘ynash har bir san’atkorga ham nasib etavermaydi. Hozircha bunday imkoniyatga ega bo‘lmagan bo‘lsa-da, aktrisa o‘zini turli obrazlarda namoyon etish umidini yo‘qotmaganini aytdi.