Мария Захарова АКШнын Борбор Азияга кызыгуусуна кандай жооп болорун айтты

Россиянын Тышкы иштер министрлигинин расмий өкүлү Мария Захарова АКШнын Борбор Азия өлкөлөрү менен байланышын Москва кылдат байкай турганын билдирди. «Интерфакс» маалымдагандай, ал бул тууралуу брифингде АКШнын мамлекеттик катчысы Марко Рубионун Өзбекстанга сапарына байланыштуу суроого жооп берип жатып айтты. Захарованын айтымында, Вашингтондун аймакка кызыгуусу жаңы көрүнүш эмес: АКШнын ар башка администрациялары аны ар башкача, ар кандай жигердүүлүк менен ишке ашырып келген. Ал Американын мамилесин Борбор Азия менен тең укуктуу кызматташууга эмес, биринчи кезекте аймактын ресурстарына кызыгууга байланыштырды. Расмий өкүл Москва АКШнын аймак өлкөлөрү менен мамилесинин өнүгүшүн байкап, андан жыйынтык чыгарарын айтты. Анын сөзүнө караганда, эгер бул алакалар Россияга каршы багытталган аракеттерди же Борбор Азия мамлекеттерине Москва менен байланыштарын өнүктүрбөөгө кысым көрсөтүүнү камтыса, Россия тиешелүү түрдө жооп кайтарат. Ошол эле учурда Захарова Россиянын Борбор Азия мамлекеттери менен достук мамилелери өз алдынча баалуулукка ээ экенин белгиледи. Анын билдиришинче, бул байланыштар геосаясий жагдайдан көз каранды болбошу керек жана өлкөлөрдүн өнүгүүсү бири-биринин эсебинен жүрбөй, өз ара пайдалуу болушу зарыл. Захарова кызматташтык өнөктөштөрдү басмырлабастан, эки тарапка тең пайда алып келүүгө тийиш деп эсептейт. Ал Борбор Азия өлкөлөрү мындай мамиленин маанисин жакшы түшүнөрүн кошумчалады.