Садыр Жапаров насыяга үй куруп, оңдогондорго карыздын тобокелин эскертти

Президент Садыр Жапаров Чүй облусундагы тургундар менен жолугушууда үй куруу же оңдоо үчүн насыя алуу тууралуу оюн айтты. Sputnik маалымдагандай, жарандардын бири үйүн бүтүрүүгө жылдык 10 пайыздык чен менен кредит ала албай жатканын айтып кайрылган. Буга жооп берген мамлекет башчы карызга алынган акча киреше алып келиши керектигин белгилеген. Жапаровдун айтымында, 10 пайыз менен алынган насыядан түшкөн пайда бул чыгымдан жогору болгондо гана мындай кадамды каржылык жактан негиздүү деп кароого болот. Ал үйдү оңдоого ашыкча каражат жок болсо, убактылуу жылуулатып жашап турууну сунуштап, оңдоо үчүн карыз алууга каршы пикирин билдирген. Президент насыяны төлөй албай калган учурда үйдү күрөөгө коюу олуттуу кесепетке алып келиши мүмкүн экенин да эскерткен. Анын сөзүнө караганда, банкка күрөөгө берилген турак жайынан ажыраган адамдар кийин бийликке даттанышат. Жапаров мындай жагдайлардын себебин айрым жарандардын каржылык сабаттуулугунун жетишсиздиги менен байланыштырган. Жолугушуу учурунда айтылган бул пикир кредит алууга тыюу салуу катары эмес, карыздын шартын жана аны кайтаруу мүмкүнчүлүгүн алдын ала эсептөө тууралуу эскертүү катары берилди. Президент өзгөчө үй куруу же оңдоо сыяктуу иштерге насыя алууда анын баасын гана эмес, төлөмдөр үй-бүлөнүн бюджетине кандай таасир этерин да таразалоого чакырды.