Шавкат Мирзиёев иқлим лойиҳалари бўйича Яшил иқлим фонди раҳбари билан келишди

Ўзбекистон президенти Шавкат Мирзиёев Анталияда амалий ташрифи давомида Яшил иқлим фонди ижрочи директори Мафальда Дуэрте билан учрашди. Президент матбуот хизмати хабар беришича, мулоқот давлат раҳбари учун ажратилган қароргоҳда бўлиб ўтган. Суҳбатда иқлим ўзгаришига мослашиш борасидаги ҳамкорликни кенгайтириш ва иқлим лойиҳаларига молия жалб қилиш масалалари муҳокама қилинган. Томонлар фонд билан шериклик алоқалари мустаҳкамланаётганини қайд этган. Манбага кўра, қўшма лойиҳалар портфелининг қиймати 200 миллион доллардан ошган. Мирзиёев Марказий Осиёда иқлим ўзгаришига чидамли ландшафтлар барпо этишга қаратилган минтақавий дастур маъқулланганини олқишлаган. Учрашувда Ўзбекистон молия институтларининг фонд маблағларидан тўғридан тўғри фойдаланиш имкониятини яратиш ҳам муҳим вазифа сифатида тилга олинган. Шунингдек, мамлакатда иқлим билан боғлиқ йирик инвестиция дастурини шакллантириш масаласи муҳокама этилган. Унинг йўналишлари қаторида Оролбўйини экологик тиклаш ва «яшил» шаҳарларни ривожлантириш борлиги айтилган. Учрашув якунида шерикликни мустаҳкамлаш ва янги қўшма лойиҳаларни амалга ошириш бўйича келишувга эришилган, деб хабар қилди президент матбуот хизмати.