Արտակ Բեգլարյանը պահանջում է՝ անձնագրում ծննդավայրը չնշել որպես Ադրբեջան

Արցախի Հանրապետության նախկին պետնախարար Արտակ Բեգլարյանը դիմել է Հայփոստին՝ կենսաչափական անձնագիր ստանալու համար։ Միաժամանակ նա դիմում է ներկայացրել ՆԳՆ՝ պահանջելով, որ իր անձնագրում ծննդավայրը չնշվի որպես Ադրբեջան։ Այս մասին հայտնել է ինքը՝ Բեգլարյանը։
Նրա խոսքով՝ եթե դիմումը մերժվի, պատրաստվում է վիճարկել որոշումը դատական կարգով և հարցը, անհրաժեշտության դեպքում, հասցնել մինչև Մարդու իրավունքների եվրոպական դատարան։ Բեգլարյանը համոզմունք է հայտնել, որ իրենք իրավացի են, և հայտարարել, որ շարունակելու են պայքարել, որպեսզի իրենց անձնագրերում ծննդավայրի տվյալներում չնշվի այդ երկիրը։
Բեգլարյանը նաև համեմատել է իր անձը հաստատող փաստաթղթերում առկա տվյալները։ Նրա գրառման համաձայն՝ 2024 թվականին ստացած Հայաստանի անձնագրում ծննդավայրը նշված է Ստեփանակերտ, իսկ նույնականացման քարտում՝ Հայաստանի Հանրապետություն։ Նա այդ տարբերությունը ներկայացրել է որպես իրավական հետևողականության և որոշակիության բացակայության օրինակ։
Գրառման մեջ նշվում է նաև, որ Արցախից բռնի տեղահանված քաղաքացիների անձնագրերում ծննդավայրի երկիր է նշվում Ադրբեջանը։ Բեգլարյանի դիմումը վերաբերում է անձամբ իր փաստաթղթերում այդ տվյալը փոխելուն, իսկ հնարավոր մերժման դեպքում նա մտադիր է հարցը տեղափոխել դատարան։
Աղբյուր ↗