Գաբրիելա Ալվարես Մինթե. «Ընտանիքները փոխվում են, բայց չեն կորցնում իրենց կարևորությունը»

Gabriela Alvarez Minte
ՄԱԿ-ի Բնակչության հիմնադրամի Արևելյան Եվրոպայի և Կենտրոնական Ասիայի տարածաշրջանային գրասենյակի գենդերային հարցերով խորհրդական Գաբրիելա Ալվարես Մինթեն Մեդիամաքսին տված հարցազրույցում խոսել է ընտանիքների փոփոխվող ձևերի ու դրանց հասարակական ընկալման մասին։ Նրա խոսքով՝ ընտանիքի ավանդական իդեալականացված պատկերը երբեք ամբողջությամբ չի արտացոլել իրականությունը․ ընտանեկան բազմազանությունը գոյություն է ունեցել տարբեր ժամանակներում, իսկ հասարակությունների փոփոխությանը զուգահեռ փոխվել են նաև ընտանիքների կազմն ու ներսում ձևավորվող հարաբերությունները։ Մինթեն նշել է, որ այժմ աստիճանաբար ձևավորվում են ավելի հավասար և պակաս հիերարխիկ հարաբերություններ, թեև մեծահասակների և երեխաների միջև որոշ հիերարխիա շարունակում է պահպանվել։ Նա ընդգծել է, որ միայն ընտանիքի կազմը չէ, որ փոխվում է. տարբեր են դառնում նաև միասին ապրելու և միմյանց հետ հարաբերվելու ձևերը։ Խորհրդականի համոզմամբ՝ ընտանիքի ձևերի բազմազանությունը չի նշանակում, որ ընտանիքը պակաս կարևոր է դարձել։ Այն շարունակում է մնալ խնամքի, սիրո և բարեկեցության կարևոր աղբյուր։ Մինթեն նշել է, որ հենց ընտանիքում են մարդիկ մեծանում, ձևավորում ինքնությունը և ստեղծում խոր հուզական կապեր։ Նա սա համարել է կարևոր փաստարկ այն մտահոգությունների քննարկման ժամանակ, որոնք առաջանում են ընտանեկան կառուցվածքների փոփոխության շուրջ։ Միևնույն ժամանակ, հարցազրույցում նա ուշադրություն է հրավիրել նաև ընտանիքի ոչ միշտ տեսանելի կողմերին։ Նրա խոսքով՝ ընտանիքը կարող է լինել մեկուսացման և խտրականության վերարտադրման միջավայր, հատկապես կանանց, երեխաների և տարեցների համար։ Ավանդական իդեալի մասին խոսելիս, ըստ Մինթեի, երբեմն մոռացվում է, որ ընտանիքում կարող են լինել վեճեր, անհավասար հարաբերություններ և բռնություն։ Նա կանանց ու երեխաների նկատմամբ բռնության բարձր մակարդակը ներկայացրել է որպես այդ իրողության վկայություն։ Մինթեն հարցադրում է՝ արդյոք «ավանդական իդեալական ընտանիքի» պատկերացումը համապատասխանում է այն բանին, թե մարդիկ ինչպես են ապրում այսօր։ Նրա ներկայացրած մոտեցմամբ՝ ընտանիքի գաղափարը վերանայելը նշանակում է հաշվի առնել իրական կյանքի բազմազանությունը՝ միաժամանակ չնվազեցնելով ընտանիքի նշանակությունը։
Աղբյուր ↗