Գագիկ Մաթևոսյանը՝ Նոր Հաճնի ընտրությունների մասին․ «Ժողովուրդը գնահատականը կտա»

Նոր Հաճնում ավագանու ընտրություններին ընդառաջ պայքարը ծավալվում է գործող համայնքապետ Գագիկ Մաթևոսյանի և երկու այլ քաղաքական ուժերի թեկնածուների միջև։ «Միասին՝ հանուն համայնքի» կուսակցության ցուցակը գլխավորում է Մաթևոսյանը, որը համայնքը ղեկավարում է 2009 թվականից։ «Գործարար» կուսակցության ցուցակով առաջադրվել է Նոր Գեղիի նախկին համայնքապետ Վարդան Պապյանը, իսկ «Քաղաքացիական պայմանագիր» կուսակցության ցուցակը գլխավորում է Գրիգորի Երանոսյանը։ Մաթևոսյանին հարցրել են, թե ինչպես է գնահատում վերընտրվելու իր հնարավորությունը՝ հաշվի առնելով, որ, ըստ հրապարակման, մրցակցող ուժերի միջև հնարավոր են հետընտրական վերադասավորումներ։ Համայնքապետը պատասխանել է․ «Ժողովուրդը գնահատականը կտա»։ Հարցին՝ ձայների անհրաժեշտ շեմը չհաղթահարելու դեպքում կմտածի՞ որևէ ուժի հետ կոալիցիա կազմելու մասին, նա ասել է, որ նման առաջարկ չի ստացել և այդ հարցը դեռ չի քննարկել։ Իր տրամադրվածության մասին հարցին էլ պատասխանել է․ «Առաջ Աստված»։ Հրապարակման համաձայն՝ Նոր Հաճնում Գրիգորի Երանոսյանին այնքան էլ լավ չեն ճանաչում, մինչդեռ բնակիչներին ավելի հայտնի է նրա հայրը՝ Արարատ Երանոսյանը, որը երկար տարիներ ղեկավարել է Նոր Հաճնի պոլիկլինիկան։ Նյութի հեղինակները նաև պնդում են, որ իշխող ուժը համայնքում առաջադրել է երկու թեկնածու, որոնք կարող են պայքարել Մաթևոսյանի դեմ, ապա ընտրություններից հետո միավորվել։ Պապյանն իր հերթին հայտնել է, որ ունի իր թիմն ու ծրագրերը, և չի ցանկանում իր թեկնածությունը դիտարկել որպես որևէ այլ ուժի հետ պայմանավորված քայլ։ Նա նշել է համայնքում բիզնեսը խթանելու, մշակութային, քաղաքաշինական և բնապահպանական խնդիրները լուծելու նպատակների մասին։ Ընտրություններից հետո համագործակցության հնարավորությունը, նրա խոսքով, կախված կլինի նրանից, թե մյուս ուժերը կկիսե՞ն իրենց գաղափարները։