Եղիշե Մելիքյանը խոսել է հավաքականում սերնդափոխության և Կիպրոսի դեմ հաղթելու նպատակի մասին

Հայաստանի ֆուտբոլի հավաքականի գլխավոր մարզիչ Եղիշե Մելիքյանը նախախաղային ասուլիսում հայտնել է, որ թիմում մեծ փոփոխություններ են կատարվել, և Կիպրոսի դեմ խաղում երկրպագուները երիտասարդ կազմ կտեսնեն։ Նրա խոսքով՝ հավաքականի առաջիկա երկու հանդիպումներում հաղթելու նպատակ են դրել, թեև արդյունքը ցույց կտա՝ որքանով կհաջողվի դա իրականացնել։ Մելիքյանի փոխանցմամբ՝ Կիպրոսի հավաքականի հետ նախորդ խաղը մանրամասն վերլուծել են և հասկացել, թե ինչի շնորհիվ մրցակիցը առավելության է հասել։ Մարզիչն ասել է, որ փորձելու են սահմանափակել Կիպրոսի ուժեղ կողմերն ու խաղալ սեփական առավելությունների հաշվին։ Նա հույս է հայտնել, որ Հայաստանի ընտրանին կհաղթի, բայց հավելել է, որ կայուն թիմ ստեղծելու համար ժամանակ և համբերություն է պետք։ Մարզիչը նշել է, որ խաղադաշտում կարող են լինել մինչև 23 տարեկան ութ ֆուտբոլիստներ, իսկ 30 տարեկան խաղացող չի լինի։ Նա թիմի երիտասարդացման այս ուղին ճիշտ է համարում՝ անկախ երկու հանդիպումների արդյունքներից։ Մելիքյանն ընդգծել է նաև, որ թիմն ունի խնդիրներ ու կորուստներ, սակայն չի ցանկանում կենտրոնանալ դրանց վրա․ ըստ նրա՝ ֆուտբոլիստները միավորված են և պատրաստվում են խաղալ թիմային ոգով։ Ասուլիսում նա անդրադարձել է նաև որոշ ֆուտբոլիստների բացակայությանը։ Մելիքյանի խոսքով՝ Բալեկյանին հրավիրել են, սակայն նա չի ցանկացել միանալ հավաքականին, իսկ Լուկաս Սելարայանը նախորդ հրավերին չի եկել։ Նա նշել է, որ Գևորգ Տարախչյանն ու Լևոն Պետրոսյանը ընդլայնված ցուցակում են և մոտ են ազգային թիմում ընդգրկվելուն։ Մարզիչը նաև պատմել է Հարվի Սարաջյանի հարցով իր մասնակցության մասին․ անձամբ խնդրել է Յուրա Մովսիսյանին խոսել նրա հետ, իսկ հետո կապ են հաստատել տեսազանգով։ Մելիքյանի խոսքով՝ աշխատանք է տարվում, որպեսզի Սարաջյանը միանա հավաքականին, և նրան գարնանը կարող են տեսնել թիմում։