نک کینن نے طلاق کے بعد شادی سے دور رہنے کی وجہ بتا دی

نک کینن کا کہنا ہے کہ ماریہ کیری سے چھ سالہ شادی ختم ہونے کے بعد وہ دوبارہ شادی کے بندھن میں بندھنے کے خواہش مند نہیں۔ ٹی وی میزبان نے حالیہ دنوں میں مورے پووچ کے پوڈکاسٹ ”آن پار ود مورے پووچ“ میں گفتگو کرتے ہوئے سابقہ رشتے اور طلاق کے تجربے پر بات کی۔ کینن کے مطابق، شادی سے پہلے کیے گئے معاہدے پر دستخط کرنا ان کے لیے کوئی مسئلہ نہیں تھا۔ ان کا کہنا تھا کہ وہ اس بات پر مطمئن تھے کہ معاہدہ کیری اور ان کے عالمی کاروباری اداروں کے تحفظ کے لیے بنایا گیا، جبکہ اس سے دونوں فریقوں کو تحفظ بھی ملا۔ انہوں نے کہا کہ بالآخر اس انتظام نے دونوں کی مدد کی۔ انہوں نے وضاحت کی کہ مشکل معاہدہ نہیں بلکہ شادی ختم کرنے کا طویل عمل تھا۔ کینن کے بقول، طلاق میں کافی وقت لگ سکتا ہے اور یہ ذہنی طور پر تھکا دینے والی ہوتی ہے۔ انہیں خدشہ تھا کہ علیحدگی کا یہ مرحلہ ان کی دوستی کو متاثر کر سکتا تھا، لیکن دونوں نے اس صورتِ حال کو خاندان کے طور پر سنبھالنے کی کوشش کی۔ کینن نے کہا کہ نہ انہوں نے کیری کے بارے میں برا کہا اور نہ ان کے مطابق کیری نے ان کے خلاف بات کی۔ ان کے بقول، دونوں نے بچوں کو ترجیح دی اور علیحدگی کو محبت اور احترام کے ساتھ آگے بڑھایا۔ انہوں نے اس تعلق کو آج بھی خوش گوار قرار دیتے ہوئے کہا کہ وہ سب ایک خاندان کی طرح ہیں اور ان کے درمیان معاملات اب بھی ٹھیک ہیں۔