सिकन्दर राजालाई जनकपुरविरुद्धको जितले दियो प्लेअफको आशा

चितवनले जनकपुर बोल्ट्सलाई हराएपछि कप्तान सिकन्दर राजाले नेपाल प्रिमियर लिगको प्लेअफमा पुग्ने सम्भावना बाँकी रहेकोमा खुसी व्यक्त गरेका छन्। खेल कठिन भए पनि टोलीले जित निकाल्न सकेको उनले बताएका छन्। उनका अनुसार डाविड मालनको अनुभवी खेलले नतिजा चितवनतर्फ मोड्न मद्दत गर्‍यो। राजाले मालन निर्णायक रहेको भन्दै महत्त्वपूर्ण खेलमा कसरी ब्याटिङ गर्नुपर्छ भन्ने उनलाई राम्रोसँग थाहा भएको बताए। ८९ रनको लक्ष्य पछ्याएको चितवनले १७.२ ओभरमा ६ विकेट गुमाएर ९२ रन बनाउँदै जित हात पारेको थियो। पहिले ब्याटिङ गरेको जनकपुरले ९ विकेटको क्षतिमा ८८ रन जोडेको थियो। खेलका उत्कृष्ट खेलाडी चुनिएका मालनले अविजित ३५ रन बनाए। उनले पिचमा धेरै अल्झिनुभन्दा साझेदारी बनाउने सोचमा खेलेको र ब्याटिङका बेला दबाब महसुस नगरेको बताए। जित सधैँ खुसीको कुरा भए पनि यो नतिजा आफ्नो टोलीका लागि विशेष रहेको उनको भनाइ थियो। यो जितपछि चितवन सात अंकसहित तालिकाको चौथो स्थानमा पुगेको छ र प्लेअफ दौडमा कायम छ। पहिलो सिजनको विजेता जनकपुर र कर्णाली याक्सको भने प्लेअफ सम्भावना समाप्त भएको छ। हारपछि जनकपुरका कप्तान हरमित सिंहले पिच सुस्त भएकाले खेल्न कठिन भएको बताए। उनले टोली युवा रहेको र आगामी दिनमा राम्रो गर्ने आशा पनि व्यक्त गरे।