सुरेश पन्थमाथि फेरि प्रश्न: १९ लाखका चेक बन्द खाताका रहेको दाबी

बर्दियाका नेकपा नेता सुरेश पन्थले प्रहरीको उपस्थितिमा दिएको साढे १९ लाख रुपैयाँका तीन चेकबाट रकम नपाएको जानुका पौडेलले दाबी गरेकी छन्। शुक्रबार बैंकमा बुझ्न जाँदा चेकमा उल्लेख भएको खाता बन्द रहेको जानकारी पाएको उनको भनाइ छ। यसअघि पुरानो आर्थिक कारोबारलाई लिएर काठमाडौंमा पन्थमाथि महिलाहरूले हातपात गरेका थिए।
पौडेलका अनुसार पन्थले ९ लाख ५६ हजार, ७ लाख ५० हजार र २ लाख ५० हजार रुपैयाँका चेक दिएका थिए। उनले बैंकबाट भुक्तानी हुन नसक्ने जानकारी पाएपछि फेरि रकम फिर्ताको समस्या परेको बताइन्।
उनको भनाइमा, २०७९ सालको निर्वाचनका बेला पन्थलाई रकम उपलब्ध गराउन आफूले वित्तीय संस्थाबाट ऋण लिएकी थिइन् र आफन्त तथा मितिनीहरूसँग पनि सापटी मागेकी थिइन्। लामो समयसम्म रकम नफर्केपछि पन्थ राष्ट्रिय स्वतन्त्र पार्टीमा प्रवेश गर्न लागेको थाहा पाएर काठमाडौंस्थित पार्टी कार्यालय पुगेको पौडेलले बताइन्। ब्याज नभई आफ्नै रकम फिर्ता मागेको उनको भनाइ छ।
पौडेलले आफूले आवाज उठाएपछि पन्थबाट रकम पाउन बाँकी रहेको दाबी गर्ने अरू मानिस पनि सम्पर्कमा आएको बताइन्। विवाद समाधान नभएसम्म उनलाई रास्वपामा प्रवेश नगराउन पार्टीका नेताहरूसँग आग्रह गरेको पनि उनले जनाइन्।
पन्थ यसअघि माओवादी र हाल नेकपाबाट बर्दियामा दुई पटक प्रतिनिधिसभा सदस्यका उम्मेदवार बनेका छन्। समाचारअनुसार उनी रास्वपामा प्रवेशको तयारीमा काठमाडौं पुगेका बेला महिलाहरूले पुरानो कारोबारको रकम माग्दै घेरेका थिए। त्यसपछि प्रहरीको उपस्थितिमा चेक दिने सहमति भएको बताइएको छ। पन्थ पक्षले रकम लिएको र केही भुक्तानी गरेको स्वीकार गरे पनि सार्वजनिक स्थानमा हातपात गर्न नहुने बताएको छ। कारोबारको बाँकी रकम र भुक्तानीबारे दुवै पक्षका भनाइ फरक छन्।
Sursa ↗