Janni Infantino AQSh Kongressi tergoviga chaqirilishi mumkin

FIFA prezidenti Janni Infantino tashkilotning AQSh prezidenti Donald Tramp va uning yaqinlari bilan aloqalari yuzasidan olib borilayotgan tekshiruv doirasida Kongressga chaqirilishi mumkin. Bu haqda The Telegraph nashri xabar bergan. AQSh Vakillar palatasining Sud qo‘mitasi iyul oyidan buyon Infantino bilan Tramp o‘rtasidagi aloqalarni o‘rganmoqda. Nashr yozishicha, Demokratlar oraliq saylovlarda g‘alaba qozonsa, qo‘mitaga kongressmen Jeymi Raskin rahbarlik qilishi ehtimoli bor. Raskin FIFA rahbarining tashkiloti AQSh prezidenti va uning ittifoqchilari bilan moliyaviy munosabatlarini tekshirish tashabbusini ilgari surgan. Qo‘mita Infantinoning Mayamidagi uyida ishlagan xizmatchiga oid hujjatlarni ham so‘ragani aytilmoqda. The Telegraph manbalariga ko‘ra, Infantino maslahatchisi Karlos Kordeirodan uy xizmatchisiga ishlash ruxsatnomasini olishda ko‘maklashishni so‘ragan. Ayrim hujjatlarda xizmatchi FIFAning AQShdagi bo‘limi ish haqi ro‘yxatida bo‘lgani ehtimoli qayd etilgan. FIFA esa qonunbuzarlik bo‘lganini qat’iyan rad etib, Infantino xizmatchining maoshini o‘z hisobidan to‘laganini bildirgan. Tekshiruv FIFAning Jahon chempionati tijoriy huquqlaridagi ulushni xususiy investorlarga sotish rejasiga ham taalluqli. Asosiy investor sifatida Trampning kuyovi Jared Kushnerning ukasi Joshua Kushner tashkil etgan Thrive Eternal kompaniyasi tilga olingan. Milliy futbol federatsiyalari va qit’a konfederatsiyalari qarshilik bildirganidan so‘ng FIFA iyulda loyihadan voz kechgan. Nashr manbalaridan biri Kushnerlar ham yanvarda ko‘rsatma berish uchun chaqirilishi mumkinligini aytgan. Infantino 2016-yildan buyon FIFAni boshqaradi va yana prezidentlikka saylanish niyatida. Keyingi saylov 2027-yil 18-mart kuni Rabotda o‘tadigan FIFA kongressida tashkil etilishi rejalashtirilgan.